7 ka balay, 1 ka establisemento nasunog sa Sambag, Jaro
ILOILO CITY — Pito ka balay ang na-record nga nasunog sa Barangay Sambag, Jaro kaina sang hapon, base sa data sang barangay officials.
Sa amo nga numero, apat ang natupok sang kalayo, samtang tatlo ang partially damaged.
Sa initial nga imbestigasyon, una nga nagtuhaw ang kalayo sa warehouse sang establishment nga Maridan, baligyaan sang mga bulong kag alcohol, antes naglaton sa kaiping sini nga mga pamalay.
Sa kabug-usan, pito ka pamilya ukon 26 ka indibidwal ang apektado sang sunog. Temporaryo nga nagatiner sa evacuation center sang barangay ang mga nasunugan.
Ginalantaw nga naghalin sa nakasaksak nga extension wire ang kalayo sa sulod sang warehouse sang Maridan, ang baligyaan sang medical supplies, antes naglapta sa mga pamalay.
Suno kay Alyas Biboy, caretaker sa Maridan, madamo sang karton sa sulod gani posible nga madasig nga nagmakot ang kalayo. Nabutang sa warehouse ang mga stocks sang surgical gloves, kag face masks kag iban pa nga supplies.
Sa interview naman kay Fire Inspector Mark Angelo Caligdong, deputy fire marshal sang Bureau of Fire Protection (BFP) – Iloilo City, 10 ka mga fire trucks ang nagbuligay agud mapalong ang kalayo.
Naglab-ut sa masobra tunga sa milyon ang balor sang kahalitan sang nasunog ang business establishment base sa initial nga data sang Iloilo City Fire Station.