4 ka sakay sang motorbanca nga nagkapan sa Concepcion, Iloilo na-rescue
Na-rescue ang apat ka sakay sang motorbanca nga nagkapan tupong sa Bago-abo island, Concepcion mga las-7:50 kahapon sang aga, Octubre 31.
Suno kay Kaye Laurio nga sakay sang nag-rescue nga pumpboat, padulong sila kun tani sa banwa sang nakita ang isa pa ka sakayan nga nagakapan.
Malayo pa lang suno sa iya sang nakita sang iya amay nga may nagapamaypay sa motorbanca nga nagakapan. Lakip sa mga sakay ang duha ka mga manunudlo nga posible nag-facilitate pa sa Barangay kag SK elections kag papuli na kun tani sa Brgy. Malangabang.
Ginpalapitan nanday Laurio ang nagakapan nga sakayan kag ginpasakay na lang ang mga pasahero pabalik sa banwa
Wala siya sang ideya kun ano ang natabo antes ang pagkapan sang sakayan pero suno sa iya, naguba ang dagpak sini.