Mga bag-o napilian nga barangay officials ginapasumiter sang drug test result sa DILG —Liga ng mga Barangay Pres. Irene Ong

Isa sa mga gina-require ni Iloilo City Mayor Jerry Treñas sa mga newly-elected barangay officials sa pagpungko nila sa puwesto ang pagsumiter sang ila drug test result sa DILG.

Suno ini kay Liga ng mga Barangay Pres. Irene Ong base sa ila nadiskusyunan sa meeting kaina upod kay Mayor Treñas kag sa taga-DILG.

Nakasugtan suno sa iya meeting nga sa Lunes ma-assume sa posisyon ang mga nagdalaug sa 2023 Barangay kag SK Elections sa siyudad. May mass oath-taking suno kay Ong sa mga nagdalaug nga opisyal sa flag ceremony sang City Hall sa Lunes.

Ipa-apas na lang suno sa iya ang inventory sang mga barangay nga wala pa makatapos agud makapungko na ang bag-o gin-elect nga mga opisyal.

Dapat man suno kay Ong nga makasumiter sang drug test result ang mga opisyal sa sulod sang isa ka semana halin sa ila pagpungko. Sakop man diri ang mga nagdaug nga kagawad kag SK officials.

Ang Liga ng mga Barangay suno kay Ong ang maga-follow up sa mga nagdaug nga opisyal kun nakasumiter na sila sang result. Kun may yara sang indi magpasa ukon madugayan suno kay Ong, nagakahulugan lang ini nga kwestiyonable ang opisyal.

Kun may mag-positive naman nga result suno kay Ong, ang police na ang bahala nga maghatag sang aksyon. —via Firingline