2 ka utod nga butkon sang tawo nasapwan sa Ticud, La Paz

ILOILO CITY – Nasapwan ang saku nga may nasulod nga duha ka butkon sang tawo sa Ticud, La Paz subong nga aga.

Suno kay Adver nga nakakita, naglawig siya sang iya karabaw sang nalabayan ang sako sa kilid lang sang dalan.

Wala man siya sang nakita nga dugo, pero nakibot sang ginbuksan nga nakita niya nga may duha ka utod nga butkon gani nagpahibalo siya sa ila kagawad.

Posible naman suno kay PLT Greg Matutino, OIC sang La Paz Police Station, nga inoras pa lang nga nautod ang duha ka butkon kun basehan ang estado sang mga butkon nga indi pa matig-a.

“Bag-o pa lang ni. Inoras pa lang siguro,” suno kay PLT Matutino.

Nagaduda naman si Dodoy, residente man sang Ticud, nga ang puti nga closed van nga iya nasugata sang nagdul-ong siya sang iya mga abyan mga la-una kaina sang kaagahon ang nagwigit sang sako nga may utod nga mga butkon.

Halin suno kay Dodoy sa Banuyao area ang van kag pagguwa na pakadto sa Baldoza. Nakita niya nga naghinay-hinay ang van sa area sa diin nasapwan ang mga butkon.

Wala nakita ni Dodoy ang mga sakay sang van tungod tinted. Wala man sang plaka ang salakyan.

Ginkuhaan sang SOCO sang finger prints ang mga kamot para ma-imbestigaran kun sin-o ang tag-iya. —via Aksyon Hotline