Bangkay sang lalaki nga wala sang ulo kag utod ang duha ka butkon nasapwan sa Buhang, Jaro; Bangkay gin-identify sang iya pamilya

ILOILO CITY — Nasapwan sa kilid sang karsada sa Buhang, Jaro ang bangkay sang lalaki nga wala na sang ulo kag utod ang duha ka butkon, pila ka oras makaligad nasapwan ang duha ka utod nga butkon sa Ticud, La Paz kahapon sang aga, Nobyembre 6.

Naga-roving ang security guard nga si Tirso Acosta sa propedad sang ginagwardiyahan niya nga bangko sakay sa iya motorsiklo sang nakita niya ang sako. 

Nagpati pa si Acosta nga basura lang ang unod sang sako gani iya ginpalapitan, apang natalupangdan niya ang nagalabaw nga tiil kag ang nakatungtong nga karton sa ibabaw sang sako. 

Nasulat sa karton ang “IBABALIK ANG KAMAY NA BAKAL BABALA SA MGA PUSHER. MERRY CHRISTMAS 2023”, may pirma kag nabutang ang PDU30//

Nagpangayo sang bulig sa barangay official ang gwardiya kag gintawgan sang pulis tubtob nga nag-abot ang Scene of the Crime Operatives (SOCO).  

May mga pilas sang pagkabuno sa dughan kag tiyan ang bangkay kag sang ginrekisa, nakita sa sulod sang iya brief ang tatlo ka sachets sang suspected illegal drugs.

Gin-claim sang pamilya halin sa San Miguel, Iloilo ang bangkay sang lalaki kag gin-identify nga si Kristopher Cabalquinto ang nasapwan.

Na-identify si Cabalquinto sang pamilya paagi sa pinali-an sang iya pilas sa tuhod sang na-aksidente sang una.

Tubtob subong, wala pa makita ang ulo sang bangkay.

INDI PA MAKA-CONCLUDE NGA MAY KAANGTANAN SA ILLEGAL DRUGS

Indi pa maka-conclude ang kapulisan kun may kaangtanan sa illegal drugs ang pagkasapo sa bangkay nga gin-identify kay Kristopher Cabalquinto.

Ginpahayag ni Iloilo City Police Office (ICPO) spokesperson Police Major Shella Mae Sangrines nga pwede ma-considerar ang amo nga anggulo apang pwede man nga patalang lang.

Nobyembre 2 pa katapusan nga nakita nga buhi si Cabalquinto suno sa iya pamilya.