ICPO wala sang kahilabtanan sa natabo kay Kristopher Cabalquinto, ang bangkay nga wala sang ulo kag magtimbang nga butkon

ILOILO CITY — Wala sang kahilabtanan ang Iloilo City Police Office sa pagkasapo sa bangkay nga wala sang ulo kag magtimbang nga butkon sa Buhang, Jaro kag duha ka utod nga butkon sa Ticud, La Paz sang Lunes sang aga, Nobyembre 6.

Ini ang gin-athag ni ICPO Director Colonel Joeresty Coronica sang ginpamangkot sang mga katapo sang media kun may posibibilidad nga government forces ang sa likod sang pagpatay sa gin-claim sang pamilya nga si Kristopher Cabalquinto sang San Miguel, Iloilo.

Tungod man ini sa nakita nga karton sa bangkay nga may nasulat nga “IBABALIK ANG KAMAY NA BAKAL BABALA SA MGA PUSHER. MERRY CHRISTMAS 2023”, may pirma kag nabutang ang PDU30.

Base sa impormasyon halin sa intelligence unit sang ICPO, involved sa illegal drugs si Cabalquinto kag sa guwa sang Iloilo City naga-operate, suno kay Coronica.

Posible suno sa iya nga may kontra sa negosyo sa illegal drugs ang biktima rason nga ginpatay siya.

Kahapon sang hapon, nasapwan sa Quezon, Arevalo ang ulo ni Cabalquinto nga nasulod man sa sako.