“Indi ko mabaton” —Mrs. Feliza Cabalquinto sa pagkasapo na sa ulo sang iya bata nga si Kristopher
ILOILO – Indi mabaton ni Mrs. Feliza Cabalquinto ang ginhimo sa iya bata nga si Kristopher Cabalquinto nga ginpanghal-id ang mga parte sang lawas sa magkatuhay nga lugar sa siyudad.
Kahapon sang hapon, nasapwan ang ulo ni Cabalquinto nga naputos sang plastic kag nasulod sa sako sa Burgos Street, Brgy. Quezon, Arevalo.
Lunes sang aga, Nobyembre 6, nasapwan ang bangkay ni Cabalquinto nga wala sang ulo kag magtimbang nga butkon sa Brgy. Buhang, Jaro. Antes sini, may nasapwan nga magtimbang nga butkon sa Brgy. Ticud, La Paz.
Gin-identify sang iloy nga ang ulo sang iya bata ang nasapwan sa Arevalo sang ginpakita sa iya ang litrato.
“Indi ko mabaton [ang natabo]. Tana gid. Nagapasalamat man ko kay nakita ang ulo. Mientras tanto indi makita ang ulo, indi man maglinong ang akon bata,” suno sa iloy.
