Ulo ni Kristopher Cabalquinto, ang bangkay nga wala sang ulo kag magtimbang nga butkon nga ginwigit sa Jaro, nasapwan sa Arevalo
ILOILO – Ginkumpirmar sang pamilya nga ulo ni Kristopher Cabalquinto sang San Miguel, Iloilo ang nasapwan sa Burgos Street, Brgy. Quezon, Arevalo kahapon, Nobyembre 7.
Una nga nasapwan ang magtimbang nga butkon ni Cabalquinto nga nasulod sa sako sa Brgy. Ticud, La Paz, las-seis sang Lunes sang aga.
Sunod nga nasapwan ang iya bangkay nga wala sang ulo kag magtimbang nga butkon sa Brgy. Buhang, Jaro mga las-8:30 kahapon sang aga. Nasulod ang bangkay sa sako nga may karton sa diin nasulat ang “IBABALIK ANG KAMAY NA BAKAL BABALA SA MGA PUSHER. MERRY CHRISTMAS 2023”, may pirma kag nabutang ang PDU30.
Base sa impormasyon, kahapon pa nakita ang sako pero wala sang may nagsapak tungod gindumdom nga basura lang. Suno naman kay Quezon, Arevalo former Barangay Kagawad Ronald Custodio, nagreklamo ang mga residente nga may nagapanimaho sa lugar kahapon gani nag-report sila sa Arevalo police.
Sang ginbukad ang sako, nasulod ang ulo kag may karton nga nakasulat: “BABALA SA MGA ADIK. IBABALIK ANG KAMAY NA BAKAL. DU30.”
Indi mabaton ni Mrs. Feliza Cabalquinto ang ginhimo sa iya bata nga si Kristopher nga ginpanghal-id ang mga parte sang lawas sa magkatuhay nga lugar sa siyudad.
Kahapon, nasapwan ang ulo ni Cabalquinto nga naputos sang plastic kag nasulod sa sako sa Burgos Street, Brgy. Quezon, Arevalo.
Gin-identify sang iloy nga ang ulo sang iya bata ang nasapwan sa Arevalo sang ginpakita sa iya ang litrato.
“Indi ko mabaton [ang natabo]. Tana gid. Nagapasalamat man ko kay nakita ang ulo. Mientras tanto indi makita ang ulo, indi man maglinong ang akon bata,” suno sa iloy.