IPPO Director Ronaldo Palomo ginkumpirmar nga may involvement sa illegal drugs si Kristopher Cabalquinto, ang gin-chop chop nga bangkay kag ginbilin sa tatlo ka distrito sa Iloilo City

Ginkumpirmar ni Iloilo Police Provincial Office Director Police Colonel Ronaldo Palomo nga yara sa monitoring sang San Miguel Police Station si Kristopher Cabalquinto, ang gin-chop-chop nga biktima kag ginbilin sa tatlo ka distrito sa Iloilo City.

Suno kay Palomo, “on and off” ang operation ni Cabalquinto.

Dugang pa niya nga nakaagi i-test buy kuntani sang San Miguel police si Cabalquinto pero wala nadayon.

Ginpabutyag man ni Palomo nga wala si Cabalquinto sa ila listahan kag newly-identified drug personality.

Si Cabalquinto ang ginpatay kag ginbilin ang iya butkon sa Ticud, La Paz, an ang iya lawas nga wala ulo sa Buhang, Jaro kag ang iya ulo sa Quezon, Arevalo nga kahapon lang nakita.

Handa naman nga magbulig ang IPPO sa Iloilo City Police Office sa pag-imbestigar sa pagpatay kay Calbalquinto.

Ginpahayag ni Palomo nga may coordination na ang Iloilo City police sa San Miguel Police may kaangtanan sa record ni Cabalquinto.

Handa man si Palomo nga maghatag sang ila mga resources sa ICPO para masolbar ang pagpatay kay Cabalquinto.

Una na ginpahayag ni ICPO Director Joeresty Coronica nga may involvement sa illegal drugs si Cabalquinto apang wala siya naga-operate sa siyudad.

Ginkumpirmar naman ni Palomo nga yara sa monitoring sang San Miguel police si Cabalquinto.