Jelma Crystel Implica sang Jereos, La Paz nagdaug nga SK Federation President sa Iloilo City
Nagdaug bilang bag-o nga Sangguniang Kabataan (SK) Federation president sa Iloilo City si Jelma Crystel Implica sang Barangay Jereos, La Paz sa ginhiwat nga eleksyon kahapon, Nobyembre 14.
Si Implica nga outgoing SK federation Public Relation Officer (PRO) sa idalum ni outgoing SK Federation President kag Ex-officio Councilor Leila Luntao, isahanon nga gin-nominate sa eleksyon.
Lunsay wala sang kontra ang mga gin-nominate kag nagdalaug nga SK federation officers.
Napilian nga SK Federation Vice President si Julienne Jean Jacquet sang Arguelles, Jaro; napilian nga secretary si Jasson Octavio sang Hibao-an Norte, Mandurriao; Treasurer si Raidine Nicole Benedicto sang Boulevard, Molo; Auditor si Yanni Ysabel Panaguiton sang Bo. Obrero, Lapuz; PRO si John Paul Elmar sang Zamora Melliza, City Proper kag Sergeant-at-Arms si Mike Elumbab sang Sto. Domingo, Arevalo.
Ginpahayag ni City DILG Director Oscar Lim nga mas maayo nga wala sang kontra ang mga nagdaug nga SK federation council tungod daku man ang tsansa nga maghugpong kag magbuligay para mapatuman sang maayo ang ila mga programa.
Posible suno sa iya nga may pag-istoryahanay na sa mga SK Officials antes pa ang eleksyon kun sin-o ang ila nga i-nominate rason nga wala sang may nagprotesta sang ginpanglawag na ang mga nagdaug nga SK Federation officers.
PASANGKARON ANG MGA PROGRAMA
Ginpasalig ni Implica nga pasangkaron ang mga programa sang SK agud maserbisyuhan ang mga pamatan-on sa siyudad.
Indi lang suno sa iya magatutok ang SK sa paghiwat sang basketball league kundi gamiton man nila ang pondo para sa iban pa nga aktibidad subong man mapalab-ut ang nagkalain-lain nga serbisyo sang gobyerno para sa kabataan.
Nagapasalamat si Implica nga nahatagan siya sang tsansa nga mangin lider sang SK federation kag paagi sa bulig sang mga SK officials, ginpasiguro niya nga maga-level up sila sa pagpa-improve sang mga programa sa kabarangayan sa siyudad.
WALA SANG IMPLUWENSYA
Gin-athag naman ni Implica nga wala sang impluwensya halin sa mga barangay officials ukon sin-o man nga pulitiko ang ila nga pagpadalagan sa SK federation.
Suno sa iya, ang ila intention kag kagustuhan nga magserbisyo sa mga kabataan kag siyudad sang Iloilo ang nagtulod sa ila nga magpartisipar sa eleksyon.
