15 ka classrooms sang Dacutan Elem. School sa Dumangas gin-ransack

ILOILO — Ginransak sang wala pa makilal-an nga mga suspects ang mga classrooms sang Dacutan Elementary School sa Dumangas.

Suno kay Police Master Sergeant Ramon Baylon, imbestigador sang Dumangas Municipal Police Station, las-5 kaina sang aga sang nadiskubrehan sang mag-utod nga estudyante nga bukas na ang room sang Grade 2 nga nahamtang sa left wing sang eskwelahan.

Nakita pa sang mag-utod ang tawo nga nagatalikod, kulong ang buhok, naga-jacket nga itom, shorts nga itom, dark complexion, ginabanta naga-edad 16 tubtob 17-anyos kag nagataas sang 5’4, suno sa police.

Natingala ang mag-utod suno sa police nga temprano pa may tawo sa kwarto gani nagguwa sila sa gate sang eskwelahan kag naglibot sa likod nga gate agud hibaluon kun didto nag-agi ang tawo pero nakibot nga sirado pa ang back gate.

Pagbalik sang mag-utod sa amo nga classroom, wala na ang tawo suno sa ila.

Pila ka minutos sang amat-amat na nga nag-abot ang mga manunudlo kag mga estudyante kag natukiban nga bukas na ang 15 tanan ka kwarto sang eskwelahan lakip ang principal’s office kag guba na ang barrel vault kag podlocks, suno sa police.

Posible gingamitan sang ginabanta lima ka mga suspects sang speeding fork ang nga podlocks agud maguba.

Sa initial nga pagpangusisa sang police nataban sang suspect ang laptop nga gin-issue pa sang DepEd sa room 4 sang Grade 2; P110 nga class fund sang kinder sa room 1; kag souvenir item sang manunudlo sa room 3.

Ginpahayag sang police nga bisan nahamtang ang eskwelahan sa kilid sang barangay hall, wala makita sa CCTV sang barangay ang mga nagransak.

Nag-duty man ang mga tanod tubtob las-4 sa kaagahon pero wala na na-monitor ang pagransak sa eskwelahan, suno sa police.

Sa subong, gina-imbestigaran sang police ang natabo.