P13.1 million nga balor sang illegal nga druga na-recover sa sulod lang sang 24-oras sa W. Visayas — PRO 6

ILOILO CITY – Masobra P13.1 million nga balor sang illegal nga druga ang na-recover sang mga kapulisan sa anti-drug operations sa sulod lang sang 24 oras sa bug-os nga Western Visayas.

Suno sa Police Regional Office (PRO) 6, may kabug-usan nga 1,925.6 grams sang suspected shabu ang nakumpiskar sang nagklalain-lain nga operating units halin sang Nobyembre 22, las-seis sang aga tubtob las-5:59 sang kaagahon sang Nobyembre 23.

Yari ang breakdown sang mga recoveries:

1. Brgy. Cano-an, Estancia, Iloilo: 1.1 kilograms – P7,480,000.00;

2. Brgy. 30, Bacolod City: 640 grams – P4,352,000.00;

3. Brgy. 6, Bacolod City: 100 grams – P680,000.00;

4. Brgy. Salvacion Habog-Habog, Molo: 70 grams – P476,000.00;

5. Negros Occidental Police Provincial Office: 11.5 grams – P78,200.00; kag

6. Capiz Police Provincial Office: 5 grams – P34,000.00

Gindayaw naman ni Police Brigadier General Sidney Villaflor, director sang PRO6, ang nagkalain-lain nga operating units tungod sa madamo nga gramos sang illegal drugs nga na-recover.

“Ang accomplishment po na ito ay hindi lamang po tagumpay ng Police Regional Office 6 kundi ng lahat ng taong tumulong para mahuli at makumpiska ang mga iligal na droga na ito. Ang mamamayan ang nagsilbing susi sa tagumpay na ito. Isulong po natin ang drug-free Western Visayas para sa payapa at ligtas na pamayanan,” suno kay Villaflor.