Tatlo ka HVI dakup sa drug buy bust sa Bakhaw, Mandurriao
ILOILO CITY—Dakup ang tatlo ka mga indibidwal sa drug buy bust nga gin-conduct sang City Drug Enforcement Unit (CDEU) sa Zone 2, Bakhaw, Mandurriao kahapon, Nobyembre 23.
Ginkilala ang main subject kay Alfredo Casipe, 35-anyos, kag duha niya ka upod nga kanday Darwin Peñafort, 48-anyos, jeepney driver; kag Arturo Decena, 58-anyos, konduktor sang jeep kag lunsay ginakabig High Value Individual (HVI).
Si Peñafort kag Decena ang taga-probinsya sang Iloilo kag gina-verify pa sang taga-CDEU kun sin-o sa ila ang taga-Pototan kag Barotac Nuevo.
Suno kay PLtCol. Antonio Benitez, head sang CDEU, gin-ako sang mga nagkaladakpan nga nagagamit sila sang illegal nga druga.
Dugang pa ni Benitez, nagakuha sang supply sang illegal nga druga ang main subject kay alyas ‘Nog-nog’ nga residente man sang Brgy. Bakhaw.
Na-recover sang kapulisan ang 21 ka sachet sang suspected illegal drugs nga ginabanta nagabug-at sang 150 ka gramo kag ginabanta nagabalor sang P741,000.
Naglawig sang tatlo ka semana ang monitoring sang otoridad sa mga subjects.
