LokalPulis

14-anyos nga lesbian nakuhaan sang suspected shabu sa Molo

ILOILO CITY — Nadakpan sang barangay tanod kag nakuhaan sang isa ka sachet sang suspected shabu ang 14-anyos nga tomboy sa Brgy. North Baluarte, Molo pasado las-4 kaina sang hapon, Nobyembre 25.

Suno kay Tanod Commander Eduardo Friya, indi pamilyar sa iya ang menor-de-edad nga nagsulod sa barangay rason nga iya ginpapondo kag gin-usisa. Pero nagpamahog pa siya suno sa tanod nga mangbuno gani iya ginrekisa.

Nakit-an suno sa tanod ang suspected shabu sa kalo sang menor-de-edad.

Ginpanginwala naman sang menor nga iya ang item nga na-recover kag ginpahayag nga makadto lang kuntani siya sa iya nobya sa barangay.

Suno pa kay North Baluarte, Molo Punong Barangay Allan Aurelio tatlo ka adlaw na nga may mga kabataan nga indi pamilyar nga nagasulod sa ila barangay.

Sa pagpangusisa sang Aksyon Radyo Iloilo, nahibaluan nga taga-Bolilao, Mandurriao ang menor-de-edad.

Ginpahayag naman ni Bolilao Mandurriao Punong Barangay Jean Pujol nga wala sang record sa ila barangay ang nadakpan.

Dugang niya, may miembro sang pamilya sang menor-de-edad nga na-involve sa illegal drugs apang usisaon niya pa kun may kahilabtanan ini sa natabo.

Gindala sa Molo Police Station ang menor-de-edad kag natalana nga i-turnover sa DSWD.

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply