2 pilason sang nakabunggo ang motorsiklo sa pick up sa New Lucena, Iloilo

ILOILO — Duha ang napilasan sang nasunog ang motorsiklo nga nakabunggo sa pick-up sa Bangga Dawis, New Lucena la-1:10 kahapon sang hapon, Nobyembre 27.

Suno kay Police Captain Rogie Panela, hepe sang New Lucena Police Station, halin sa Dumangas kag padulong kun tani sa New Lucena ang pick-up sang nagbungguanay sila sang motorsiklo nga halin sa Pototan kag paliko sa direksyon padulong sa Dumangas.

Ginpahayag ni Panela nga posible nagpreno pa ang motorsiklo pero wala nakahingagaw rason nga nalab-ut ang pick up.

Pagkatapos sini, gulpi lang nagkalayo ang motorsiklo, suno kay Panela, kag napaso ang driver kag isa ka angkas sini. Tatlo ang sakay sa motorsiklo pero wala napilasan ang isa.

Maswerte nga may fire extinguisher malapit sa lugar gani napalong gilayon ang kalayo.

Gindala sa ospital ang duha nga napilasan samtang gin-detain ang driver sang pick up.