Preso nga nagpalagyo sa Tigbauan Police Station nag-surrender na
ILOILO – Balik presuhan ang preso nga nagpalagyo sa Tigbauan Municipal Police Station sang nag-surrender sa kapulisan subong nga gab-i.
Ini ang ginkumpirmar ni Iloilo Police Provincial Office (IPPO) Director, PCOL Ronaldo Palomo sa programa nga Firingline sang Aksyon Radyo Iloilo.
Sang Nobyembre 25 sang kaagahon, nakapalagyo si Jesry Manlapuz alyas Kalbo, 21, sang Barangay 2, Poblacion, Tigbauan. Nadakpan siya tungod sa kaso may kaangtanan sa illegal nga druga.
Una nga nag-ayo si Manlapuz nga mangihi sa guwa sang karsel gani ginpasugtan sang police pero gulpi lang nga nagpalagyo.
Suno kay Ann nga utod sang preso, nagderitso sa Leon, Iloilo ang iya utod matapos nga nagpalagyo.
Ginpahayag naman ni Police Captain Mary Jane Panes hepe sang Tigbauan Municipal Police Station nga base ila impormasyon, pagkatapos nagpalagyo ang presu nagpanago pa siya sa Tigbauan kag sang nakatyempo, nagkadto siya sa Oton, kag nagpa-Leon.
Las-7 sang gab-i nag-surrender paagi kay Iloilo Police Provincial Director Police Colonel Ronaldo Palomo si Manlapuz, suno kay Panes.
Halin sa Buga, Leon ginsugat ang presu kag ginturn-over sa Tigbauan Police Station, dugang niya.
