Mag-iloy dakup sa drug buy bust sa City Proper
ILOILO CITY — Arestado ang mag-iloy sa drug buy bust operation sa Tanza Timawa Zone 2, City Proper kagab-i, Disyembre 4.
Suno kay Kagawad Henry Cielo, wala na-monitor sang barangay ang illegal activities sang mag-iloy nga Madonna Lavalle kag Reynier, 19-anyos.
Sa impormasyon niya, tokhang surrenderer ang iloy kag sang natapos ang rehabilitation, ginkuha siya nga tanod sang barangay tubtob nangin commander.
Pero nag-resign si Madonna antes ang eleksyon tungod indi maka-agwanta sang pulaw sa duty, suno sa kagawad.
Samtang ang bata, naga-sideline sa pagbiyahe sang tricycle suno kay Cielo kag involved man sa mga rumble sa City Proper.
Ginpahayag ni Police Capt Roque Gemino III, hepe sang City Proper Police Station, nga na-recover sa mag-iloy ang apat ka sachets sang suspected shabu nga may standard drug price nga P156, 400.
Ginakuha sang subject ang supply sang illegal drugs sa Molo, dugang ni Gemino.
Ginpanginwala sang iloy nga nagabaligya siya sang illegal drugs.
