Pag-retrieve sang dash cam, memory card sang Ceres bus nga nahulog sa pil-as sa Hamtic, Antique ginmandu ni Gov. Rhodora Cadiao

Importante nga ebidensiya ang dash cam kag ang memory card sang Ceres bus nga nahulog sa pil-as sa Brgy. Igbucagay, Hamtic, Antique para sa maid-id nga imbestigasyon agud matumod ang matuod nga rason sang aksidente sang Disyembre 5.

Suno ini kay Antique Gov. Rhodora Cadiao sang ginmandu niya kay Antique Police Provincial Office Director Col. Rogelio Abran, Jr. nga i-retrieve sa Vallacar Transit Incorporated ang dash cam kag memory card sang bus nga nahulog sa pil-as.

“We need a thorough investigation once the memory card is handed over to us. I appeal to Police Col. Abran to facilitate the return of the equipment and seek assistance from the NBI to delve into the specifics of what transpired with the Ceres bus. We must scrutinize every angle to understand the reasons behind this tragedy,” suno kay Gov. Cadiao.

Dapat suno gobernador nga matun-an sang maayo ang tanan nga aspeto agud mahibaluan ang rason sang aksidente.

“Let’s examine every aspect; what occurred on December 5, whether it was a mechanical issue or related to road design. We need a comprehensive understanding,” dugang pa sang gobernador.

Ginpabutyag pa ni Gov. Cadiao nga dapat mag-invest ang kompaniya sang mga dash cam nga may mataas nga kalidad tungod kalabanan sa mga ini ang ginabutang sa atubang nga porsyon sang salakyan kag madasig nga maguba kun may aksidente.

Mas maayo suno sa iya nga may mapag-on nga equipment ang kompaniya agud matumod ang matuod nga hitabo kun may aksidente kag malikawan ang wala sang basehan nga mga akusasyon.

Una na ginpahayag ni Ms. Jade Marquez, media relations officer sang Vallacar Transit nga na-recover na nila ang dash cam sang bus apang indi na ini mapuslan tungod nawasak sa aksidente. — via The Antique Provincial Government