5 ka establisemento sa City Proper ginpaandaman tungod sa pagbaligya sang makahulubog nga ilimnon malapit sa eskwelahan

ILOILO CITY — Ginbisitahan sang Task Force on Morals and Values Formation ang lima ka mga establisemento sa Aurora Subdivision sa City Proper agud paandaman tungod sa pagbaligya sang makahulubog nga ilimnon malapit sa eskwelahan.

Suno kay Task Force Head Nestor Canong, ginpakitaan nila sang notice of violation ang mga tag-iya sang establisemento kag ginhambalan nga pasiraduhan kun magpadayon sa pagbaligya sang ilimnon.

Ginpaathag niya nga base sa ordinansa sang siyudad, ginadumilian ang pag-establish kag pag-maintain sang balay ilimnan sa sulod sang 500 linear meters sa palibot sang mga eskwelahan.

Madamo man suno sa iya sang mga reklamo nga nakalab-ot kay Iloilo City Mayor Jerry Treñas halin sa mga ginikanan, manunudlo, home owners, kag mga barangay officials parte sa pagbaligya sang ilimnon sang mga ginpaandaman nga mga establisemento.

Lakip sa mga establisemento ang Wanbats, Local Vibes, Food Strip, Casa Rossio Resto Bar, kag D&J Jungle Resto Bar.