1 patay, 2 pilason sang nag-amok ang lalaki sa Banate
ILOILO — Dead-on-arrival sa ospital ang lalaki nga natiruhan sang ginpahayag nag-amok sa Brgy. Poblacion, Banate kagab-i, Disyembre 14.
Ini ang ginkumpirmar ni PLT, General Enrique Robles, OIC sang Banate Municipal Police Station.
Ginpahayag ni Robles nga antes natiruhan ang biktima nga si Roderick Villanueva, nakabaton sila sang report mga pasado las-6 sang gab-i nga may lalaki nga nagalakat nga may bitbit nga binangon kag kutsilyo sa Esplanade 1 rason nga ginrespondehan sang lima ka mga pulis.
Ginlagas pa sang mga police si Villanueva pero nakadanlog si Police Executive Master Sergeant Geronimo Gano gani napalapitan ni Villanueva kag ginbuno sa likod, suno kay Robles.
Nagpukutay pa kanday Villanueva kag Sergeant Gano tubtob naggabot ang pulis sang iya .9mm service firearm kag gintiro ang biktima, dugang ni Robles.
Gindala sa ospital si Villanueva pero gindeklarar nga dead-on-arrival tungod sang pilas sang pagkatiro sa dughan, suno kay Robles.
Gin-refer naman sa ospital sa Iloilo City si Sergeant Gano nga may pilas sang pagkabuno.
Magluwas sa ila, gindala man sa ospital si Sandro Tesoro tungod naigo sang bala sa tuo nga batiis samtang nagatambong sa event nga ginahiwat sa Esplanade 1 sa Poblacion.
Ginpabutyag ni Robles nga ginahibalo pa nila kun paano naigo sang bala si Tesoro,
Sa initial nga pagpangusisa sang Banate police, nagpalupok pa sang pusil si Police Corporal Philip Silver Zamora agud mag-pacify kanday Villanueva kag Gano.
