Solterito patay sang nalumos sa resort sa Guimbal
ILOILO — Patay na sang nasapwan sa higad sang baybay ang 15-anyos nga solterito sa isa ka resort sa Brgy. Nanga, Guimbal pasado las-9:20 subong nga aga.
Suno kay Police Corporal Carl Francis Boston, imbestigador sang Guimbal Municipal Police Station, halin sa Leon ang masobra 20 ka pamatan-on nga nagpaligo sa resort.
Pasado las-10 kahapon sila naka-abot sa resort kag las-4:00 sang hapon nakapauli.
Natingala ang mga kaupdanan sang solterito nga wala siya nakatakas. Pero may nakahambal nga nakita niya nga nagtakas sa tubig ang solterito gani nga naglakat naman ang iya mga kaupdanan sa pagpati nga nag-una siya pauli sa Leon.
Pasado las-12 kaina sang kaagahon, nag-report sa police ang magulang sang biktima nga wala pa siya makapauli.
Nakabaton sang report ang Guimbal police kaina sang aga nga may nasapwan nga patay sa higad sang baybay gani nga gin-upod ang pamilya sang solterito kag nakumpirmar nga himata nila ang nasapwan.
