Bangkay sang manugpangisda nga gin-report missing nasapwan sa Concepcion, Iloilo
Patay na sang nasapwan nga naga-utaw utaw sa baybayon nga sakop sang Brgy. Tambaliza, Concepcion ang manugpangisda kaina sang aga.
Una na gin-report nga missing ang manugpangisda nga ginkilala kay Gene Nopueto, 35 anyos sang Brgy. Talotu-an, Concepcion, sang nahulog sa ginasakyan nga pumpboat sang Disyembre 24, pasado las-4 sang hapon.
Suno kay PMajor Samuel Vipinosa, hepe sang Concepcion Municipal Police Station, halin sa banwa sang Concepcion ang pumpboat kag papuli na sa Brgy. Talotu-an tungod may gindul-ong nga bisita sang nahulog ang biktima. Ginhingagaw pa nga i-rescue sang iya mga kaupdanan ang biktima pero wala na siya nakita.
Sa imbestigasyon sang pulis, posible nahulog ang biktima tungod gin-atake sang iya epilepsy.
Kaina sang aga, pasado las-8, nakabaton ang Concepcion police sang report halin sa Municipal Disaster Risk Reduction and Management Office- Concepcion nga may nasapwan nga bangkay sang lalaki sa baybayon nga sakop sang Brgy. Tambaliza, Concepcion. Ginkumpirmar sang upod sang biktima ang iya bangkay.
Wala pa sang plano ang pamilya kun ipaidalum sa autopsy ang bangkay.