Anay preso nga “naga-organize” sang grupo agud mag-engage sa illegal activities dakup sa drug buy bust sa Arevalo
ILOILO CITY — Dakup ang anay preso kag ang tatlo ka iban pa sa drug buy bust operation sa Sto Niño Sur, Arevalo kagab-i, Disyembre 26.
Ginkilala ang subject kay Luigi Allaway, 36-anyos nga tumandok sang amo man nga lugar. Sang Mayo lang nakaguwa sa presuhan sa kaso may kaangtanan sa illegal drugs ang subject.
Nadakpan man si alyas Samantha, 19-anyos sang West Timawa, Molo; alyas Jonas, 21-anyos sang San Jose Arevalo; kag 16-anyos nga lalaki nga taga-Sta Cruz, Arevalo.
Suno kay PLt Colonel Antonio Benitez Jr, head sang City Drug Enforcement Unit (CDEU), nakabaton sila sang impormasyon nga liwat naman nga naga-engage sa illegal activities ang subject kag “naga-organize” pa sang grupo nga ginatawag nga TBS.
Sa matandaan suno kay Benitez, ang TBS amo ang grupo sadto sang mga pamatan-on nga nagpanghold-up kag nagpatay sang taxi drivers. Posible suno kay Benitez nga ipadayon ini sang subject.
Sa impormasyon sang CDEU, sugod sang nakaguwa si Allaway sa presuhan, nagatipon ang mga pamatan-on sa payag niya kag nagahimo ang illegal activities.
Tatlo ka bulan nga gin-monitor sang police ang aktibidad sang subject tubtob nadakpan.
Dose (12) ka sachets sang suspected shabu nga nagabug-at sang 120 grams kag may standard drug price nga P815,000 ang na-recover subong nga gab-i.
Gina-verify na sang kapulisan suno kay Benitez ang impormasyon nga indi sa Iloilo nagakuha sang supply sang illegal drugs ang subject.
