Mga nasunugan sa Salvacion Habog-Habog, Molo nakahalin na sa evacuation center

ILOILO CITY – Nakabiya na sa Baluarte Elementary School nga nagaserbe nga evacuation center ang mga nasunugan sa Brgy. Salvacion Habog-Habog, Molo.

Ini tungod tubtob lang Disyembre 30 sila ginpasugtan nga makatiner sa evacuation center, samtang ginahulat nga makapatindog liwat sang balay.

Suno kay Punong Barangay Nelson Muñoz, may mga pamilya nga amat-amat na nga nagapatindog sang balay, may mga nagtiner temporaryo sa ila himata, kag may mga nagpangita sang boarding house.

Ginpasiguro man sang kapitan nga bastante nga panapton ang nabaton sang mga nasunugan tungod madamo ang nagpalab-ot sang bulig.

Sang Disyembre 16, 84 ka pamilya ang nadulaan sang balay sang nagluntad ang daku nga sunog sa nasambit nga barangay nga nagbilin sang tatlo ka napatay. —via Firingline