7 ka planta sa Panay nagdungan trip-off tungod sa “external problems” rason sang lapnagon nga power outage — Iloilo Gov. Arthur Defensor, Jr.
Nagdungan nga nag-trip-off ang pito ka mga planta sa Panay tungod sa “external problems” ukon ang pag-detect sang problema sang protection system sang mga planta sa grid sang National Grid Corporation of the Philippines (NGCP).
Ini ang nangin maathag nga explinasyon sang mga planta sa ginpatawag nga emergency meeting ni Iloilo Governor Arthur Defensor, Jr. kahapon, Enero 4.
Suno kay Defensor, ginkumpirmar sang Palm Concepcion Power Corporation (PCPC) nga halin sa guwa ukon grid sang NGCP ang rason sa pag-trip off sang ila nga planta.
“Kaina maathag gid sa pamangkot ko, now and so far as the seven other plants is concerned ano ang rason kun ngaa nag-trip [off] kamo? So ginsabat sang PCPC halin sa guwa ang disturbance rason nga nag-trip [off] kami,” pahayag pa ni Defensor.
Kumporme naman ang gobernador nga naga-trip off gid man ang mga linya kun may ma-detect nga problema sa mga linya.
Nagmandu naman si DOE Secretary Raphael Lotilla nga i-improve sang NGCP ang ila nga frequency kag load management.
Gin-presentar naman liwat ni Defensor ang lima ka mga directiba ni President Ferdinand Marcos, Jr.
Las-9 kaina sang aga nagpatawag sang meeting si Defensor kaupod ang si DOE Secretary Raphael Lotilla, opisyales sang NGCP kag iban nga stakeholders.
