Power supply sa Panay balik na sa normal

Balik na sa normal ang supply sang elektrisidad sa Panay sang nakabalik ang Palm Concepcion Power Corp. (PCPC) sa grid sang National Grid Corp. of the Philippines (NGCP).

Ginkumpirmar ni Joy Fantilaga, spokesperson sang MORE Power nga distribution utility sa Iloilo City, nga nagbalik ang supply sa tanan nga residential kag private feeders sa ila franchise area las-12:31 kahapon sang hapon, Enero 5.

Ginkumpirmar man sang general managers sang ILECO 1, 2, kag 3 nga nagbalik sa normal ang power supplies sa ila mga substations las-12:30 kahapon sang hapon.

Enero 2 sang hapon nagluntad ang power outage sa Panay, Guimaras kag porsyon sang Negros.

Multiple power tripping sang mga power plants sa Panay ang rason sang outage pero wala gihapon mahibaluan kun ano ang nag-trigger sini.