Solterito patay sang aksidente nga natiruhan ang kaugalingon sa Janiuay

ILOILO — Patay ang 16-anyos nga solterito sang aksidente nga natiruhan ang iya kaugalingon sa Barangay Don T. Lutero East, Janiuay las-9:50 sang gab-i sang Enero 4.

Suno kay Police Captain Alwyn Salmon, yara sa kamalig sa guwa sang ila balay ang solterito upod sa iya abyan sang gulpi naglupok ang caliber 45 nga pusil nga iya gina-uyatan.

Ginpahayag ni Salmon nga yara man sa sulod sang balay ang pamilya sang solterito rason nga sang may nabati-an sila nga lupok kag nakita nga ginahakwat na sang iya abyan ang biktima, gilayon siya nga gindala sa ospital tungod sa pilas sang pagkatiro sa ulo apang gindeklarar nga dead on arrival sa ospital.

Tubtob subong wala gihapon mahibaluan kun sa diin ginkuha sang solterito ang pusil.

Wala man sang may ginsugid ang abyan sang biktima kun sa diin posible halin ang pusil suno sa police. —via Maria Kayla Tingzon