Iloilo Gov. Arthur Defensor, Jr. ginatun-an ang pag-file sang kaso batok sa NGCP tungod sa lapnagon nga power outage sang nagligad nga semana
ILOILO — Ginakonsiderar ni Iloilo Governor Arthur Defensor, Jr. nga magpasaka sang kaso batok sa National Grid Corporation of the Philippines (NGCP) tungod sa epekto kag kapierdehan sang probinsiya sa nagluntad nga lapnagon nga power outage sa Panay, Guimaras kag porsyon sang Negros Occidental nga nag-umpisa sang Enero 2 kag naglawig tubtob Enero 5.
Suno kay Defensor, dako nga halit ang ginbilin sang tatlo ka adlaw nga wala sang kuryente sa Panay Island ilabe na gid sa mga household, negosyante kag iban pa.
Una nga matambong sang congressional inquiry ang gobernador bilang isa sa mga resource person nga hiwaton sa Enero 11 kag Senate inquiry sa Enero 10 agud nga makatipon sang impormasyon kag datos.
Pagkatapos sang hearing i-examine naman sang gobernador ang tanan nga energy laws kag iban pa nga layi agud nga mahibaluan kun may violation sa franchise sang NGCP.
“Pamatian naton ang duha ka mga hearing sa congress kag sa house of representatives kag sa senado and we will examine the energy laws, EPIRA and other related laws [of] the franchise of NGCP. And then we will see. A class suit is an option because damage has been cost on our people,” pahayag pa ni Defensor.
Mahimo nga maka-file sang class suit suno kay Defensor batok sa NGCP sa idalom sang civil code.
Sang damlag lang nagpatawag sang meeting si Defensor sa mga opisyales sang Department of Energy (DOE), NGCP, power generators sa panay kag iban pa apang kulang ang tiempo agud nga makatipon sang tanan nga datos halin sa nasambit nga mga ahensya kag korporasyon agud matul-id ang matuod nga natabo sa nagluntad nga tatlo ka adlaw nga power outage.