Opening Salvo sang Dinagyang Festival gindugukan

ILOILO CITY —Wala naka-upang ang ulan sa pagpasundayag sang nagkalain-lain nga tribu sa Opening Salvo sang Dinagyang Festival 2024 kahapon, Enero 12.

Linibo ang nagdugok sa apat ka judging areas kag may mga nagbantay pa sa dalanon agud makita ang patilaw nga performance sang mga tribu sa Tribes Competition nga highlight sang Dinagyang Festival sa Enero 28.

Ang walo ka tribu amo ang Tribu Taga-Baryo sang Bo. Obrero NHS; Tribu Mandu-riyaw sang Mandurriao NHS; Tribu Paghidaet sang La Paz NHS; Tribu Pan-ay sang Fort San Pedro NHS; Tribu Salognon sang Jaro NHS; Tribu Sigabong sang Ramon Avanceña NHS; Tribu Ilonganon sang Jalandoni Memorial NHS; kag Tribu Silak sang Iloilo City NHS.

Nagpasundayag man ang mga tribu nga mapasakop sa ILOmination kag Sadsad sa Calle Real.

Sa iya mensahe, ginpabutyag ni Iloilo City Mayor Jerry Treñas nga nagakalangkag na ang mga Ilonggos kag mga turista nga masaksihan ang world-class performance sang mga tribu kag mangin kabahin sang iban pa nga aktibidad sang Dinagyang.

Nagapakita lang suno sa alkalde nga Best Tourism Event ang Dinagyang nga kilala indi lang sa Pilipinas kundi sa iban pa nga parte sang kalibutan.

Paagi sa Dinagyang suno kay Mayor Treñas, mapakita sang mga Ilonggo ang religious kag cultural events sa siyudad.