Pulis nga nag-AWOL dakup sa drug buy bust operation sa San Dionisio

P374,000 nga balor sang suspected shabu ang nakuha sa nag-AWOL nga police nga subject sa drug buy bust operation sa Brgy. Siempreviva, San Dionisio, Iloilo kahapon.

Ginkilala ang nadakpan kay Jimmy Dumancas, residente sang nasambit nga barangay.

Suno kay Police Maj. Francis Albert Fortunado, head sang Provincial Intelligence Unit, 2018 sang nag-AWOL si Dumancas sang nagguwa ang iya ngalan sa listahan ni former President Rodrigo Duterte nga naga-engage sa illegal drugs.

Nagtinir suno kay Fortunado si Dumancas sa Dubai sang duha ka tuig sang nag-AWOL siya. Apang pagbalik niya sa pungsod, na-monitor sang mga otoridad nga nagagamit siya kag nagabaligya sang illegal nga druga.

Sang nagligad nga tuig pa kuntani i-operate si Dumancas apang nabudlayan ang mga police nga matigayon ini tungod may ideya siya kun paano mag-operate ang mga otoridad.

Ginakabig nga High Value Individual si Dumancas nga nakuhaan sang 15 tanan ka sachets sang suspected shabu.

Preso na ang subject sa San Dionisio Police Station.