P1.7 million nga balor sang suspected shabu na-recover sa drug buy bust operation sa City Proper
ILOILO— P1.7 Million nga balor sang suspected shabu ang na-recover sa drug buy bust operation sa Valeria street, Brgy. Kauswagan, City Proper kagab-i, Enero 15.
Ginkilala ang mga subject kanday alyas Ernesto Guevera 43 sang Rizal Pala Pala 2, City Proper kag Ryan Bordon sang Tanza Bonifacio, City Proper.
Suno kay Police Lieutenant Colonel Antonio Benitez Jr, head sang City Drug Enforcement Unit (CDEU), duha ka semana nila nga gin-surveillance kag gin-validate ang impormasyon nga naga-engage ang duha sa illegal nga transaksyon tubtob nadakpan.
23 ka sachets sang suspected shabu nga nagabug-at sang 250 grams ang na-recover. Sa amo nga recoveries, 16 ang gagmay kag pito ang knot tied plastic sachets.
Bilog nga syudad naga-deliver sang illegal drugs ang duha suno kay Benitez samtang gina-validate pa ang ginakuhaan sang supply.
Sa pagpangusisa sang police, katatlo na ginkasuhan sang theft si Guevara kag kaisa sa kaso may kaangtanan sa illegal drugs.
Ginpanginbulahan naman ni ICPO Director Police Colonel Joeresty Coronica ang operation sang CDEU.
