P1.4 million nga balor sang suspected shabu na-recover sa buy bust operation sa hotel sa City Proper
ILOILO CITY— P1.4 million nga balor sang suspected shabu ukon 210 grams ang na-recover sa drug buy bust operation sa room sang hotel sa Brgy. Hipodromo, City Proper kahapon, Enero 17.
Ginkilala ang subject kay Virgilio Luz alyas Alog, 50-anyos nga taga-Bulacan pero temporaryo nagatiner sa Gustilo, La Paz.
Nadakpan man si Joland Male, 24-anyos, construction worker nga taga- Brgy Aguinaldo, La Paz; kag iya live-in partner nga si Jade, 23-anyos sang Brgy Calaparan,Arevalo.
Suno kay Police Lieutenant Col Antonio Benitez Jr. Head sang City Drug Enforcement Unit nakabaton sila sang impormasyon nga naga-engage sa illegal activities si Alog gani gin-monitor sang tatlo ka semana tubtob nadakpan.
Nabaklan siya sang isa ka sachet sang suspected shabu kag na-recover pa gid ang 11 sachets sang suspected shabu.
Ginpahayag ni Benitez nga upod ni Alog sa pagbaligya sang illegal drugs ang mag-live in partner sa diin ginasugo niya sa pag-deliver sa mabakal.
Masami nga naga-check in ang subject sa hotel kag ginahatag ang illegal drugs sa maglive-in partner agud i-distribute, suno kay Benitez. Kun daku naman nga balor sang illegal drugs, si Alog ang nagadul-ong sa mabakal.
Gina-check pa sang police kun ano nga tuig nadakpan sa drug buy bust operation si Alog.
