85 ka portalets ipahamtang sa City Proper para sa Dinagyang 2024
ILOILO CITY – Amat-amat na nga gina-install sang mga personnel sang City Environment and Natural Resources Office (CENRO) sa City Proper ang mga portable toilets agud may magamit ang publiko sa tiun sang highlights sang Dinagyang Festival 2024.
Base sa data sang CENRO, 85 ka mga portalets ang ipalapta sa nagkalain-lain nga lugar sa City Proper. Mas madamo ini kun ikumparar sa 40 sang nagligad nga tuig.
Suno kay CENRO Head Neil Ravena, ginbutangan sang portalets ang likod sang stage sang mga judging areas, entrance kag exit sang mga areas sa diin nahamtang ang mga food stalls para sa Dinagyang Food Festival. Ginpasiguro ni Ravena nga may magabantay sa mga portalets agud ma-manage ini kag mapabilin ang katinlo.
“Ang aton mga portalets, 85 ini ka bilog tanan. Ang mga location sini, base ini sa location man sang mga food kioks, kag mga stages, kag performance area. Normally, gina-position ini siya sa likod sang mga stages at the same time sa entrance and exit sang mga kiosks naton,” suno kay Engr. Ravena.
Nagpaandam siya sa publiko nga may nagakaigu nga penalidad sa mga madakpan nga nagapangihi bisan diin.
