Kasadyahan sa Kabanwahanan target nga matapos antes las 7 sang gab-i
ILOILO — Target nga matapos sang Iloilo Provincial Government ang performance sang siyam ka mga tribu nga mapasakop sa Kasadyahan sa Kabanwahanan antes las-7 sang gab-i sa Enero 27 agud nga makapasakop ang tumalan-aw sa hiwaton nga religious sadsad.
Ini ang ginpahayag ni Iloilo Governor Arthur Defensor, Jr.
Ginabanta 10 ka minutos ang kadugayon sang mangin performance sang tanan nga tribu nga mapasakop sa kompetisyon.
Ma-umpisa ang kahiwatan sa isa ka Misa sa San Jose Parish Placer mga la-1:30 sang hapon kag pagasundan sang parade las-2:30 kag ma-umpisa ang performace mga las-3 sang hapon.
Ang siyam ka tribu ang pasakupan sang Katagman Festival sang Oton, Saad Festival sang Leganes, Pantat Festival sang Zarraga, Cry of Jelicuon Festival sang New Lucena, Kaing Festival sang Leon, Tultugan Festival sang Maasin, Hirinugyaw-Suguidanonay Festival sang Calinog, Banaag Festival sang Anilao, kag Kasag Festival sang Banate.
Ang kasadyahan sa kabanwahanan ang mangin “solemn offering” sang Iloilo Provincial Government sa patron sang Dinagyang Festival nga si Señor Santo Niño.
