Modernized boat nasaga-iran sang RoRo vessel sa Parola Wharf

ILOILO CITY – Nasag-iran sang RoRo vessel ang naga-angkorahe nga modernized boat sa Parola Wharf kahapon, Enero 29.

Sa impormasyon sang Aksyon Radyo Iloilo, halin sa Guimaras kag padulong sa Lapuz agud magdungka ang RoRo vessel nga may sakay nga mga pasahero.

Pero ginpahayag ni Alyas Nonoy nga tripulante sang pihak nga modernized boat nga naga-angkorage man sa wharf nakibot lang sila sang naglain ang direksyon sang RoRo vessel tubtob nakalab-ot sa panghigaron sang Parola Wharf.

Wala sang may napilasan sa insidente. Pero na-stranded ang mga pasahero sang RoRo vessel.

Nagbaskog ang hangin kag daludo sang tubig sa Iloilo River kag wala na nakontrol sang kapitan ang timon sang RoRo vessel rason nga nakalab-ot sa Parola Wharf kag nakasaga-id sa modernized boat.

Ini ang ginpa-athag ni Coast Guard Iloilo Deputy Station Commander for Operations Chief Petty Officer Richard Cebritas.

Suno sa iya, wala na nahingagaw sang kapitan sang vessel nga mapabalik sa tunga tungod indi na masarangan ang hangin.

Na-damage ang propeler, shafting, kag ulihi nga portion sang sakayan.

May sakay nga 105 ka pasahero kag 27 rolling cargoes ang vessel nga halin sa Guimaras pa-Lapuz.

Plano sang management sang fiber boat nga mag-emergency dock kag istoryahan upod sa management sang RoRo vessel ang ila settlement.