Sari-sari store sa San Rafael, Iloilo ginkawatan

Ginsulod sang wala pa makilal-an nga mga suspek ang variety store sa Brgy. Poblacion San Rafael sang Enero 31 sang kaagahon.

Suno kay PCapt. Bryan Alejo, officer-in-charge sang San Rafael Municipal Police Station, natukiban sang mga nagabantay sa kapehan sa pihak nga pwesto nga nadula ang ila lamesa. Sang ginpangita nila, nakita nila ini nga nakatabon sa roll-up door sang variety store kag bukas na. Gilayon nga nagtawag sa tag-iya sang variety store agud mapahibalo nga ginsulod sang kawatan.

Nataban sang mga kawatan ang pila ka box sang sigarilyo nga nagabalor sang P114,000 kag P5,000 nga cash.

Sa imbestigasyon sang police, posible ginplanuhan ang pagpangawat tungod wala na ang memory card sa duha ka CCTV nga na-install sa sulod sang variety store. May duha pa gid ka CCTV sa sulod pero wala naga-function. Dugang pa niya, posible naggamit sang cutter ang mga suspek agud maguba ang kandado sang roll-up door.

Indi magnubo sa duha ukon tatlo ang mga nagpangawat sa variety store suno sa police.

Padayon pa nga gina-imbestigaran sang San Rafael police ang insidente.