Lalaki nga nagtambag sa away sang mag-ulutod patay sang natiruhan sa Batad

ILOILO—Patay ang lalaki nga nagtambag sa away sang mag-ulutod sa Brgy. Pasayan, Batad, las-6:30 kagab-i.

Suno kay Police Master Sergeant Pejie Bunda, imbestigador sang Batad Police, ginkilala ang biktima kay Mark Gregori Beloso, 18-anyos. Samtang, ang suspect amo si John Morales, 21-anyos.

Base sa imbestigasyon Batad police, antes natabo ang insidente, naga-inum-inom pa ang mag-utod nga kanday John, Mark John, kag John Kevin sa guwa sang ila balay sang hinali lang may natabo nga komosyon sa tunga nila.

Gilayon nga nagpatunga si Beloso agud magtambag kay John batuk sa duha niya ka mga utod sang gulpi lang may nabatian nga lupok.

Nakit-an nga natumba si Beloso kag may igu sang bala sa liug.

Suno naman kay Morales, ginataklos niya ang 12 gauge pellet shotgun kag aksidente nga nahulog tungod sa komosyon nga rason sa paglupok.

Preso na sa Batad Police ang suspect apang wala na na-recover ang pusil nga iya gingamit.

Nagapadayon pa ang imbestigasyon sang police agud matumod kun aksidente ukon hungod ang pagpalupok sang pusil.