St. Joseph School Iloilo manirado na

ILOILO CITY – Makaligad ang 52 ka tuig nga pag-egsister sa siyudad bilang isa sa nagapanguna nga eskuwelahan, gin-anunsyar sang management sang St. Joseph School Iloilo nga ini na ang ila katapusan nga tuig.

Manirado ang eskwelahan sa pagtapos sang School Year 2023-2024.

Base sa impormasyon, daku nga kapierdihan ilabe na sa tiun sang COVID-19 pandemic ang isa sa mga rason nga nagdesisyon ang management nga mag-untat na sang operasyon subong nga tuig.

1972 sang gintukod ni Mrs. Garcia kag iya bana nga si the late Roberto Garcia ang St. Joseph Kinder School kag nagsugod lang sa tatlo ka manunudlo, isa ka office staff kag 40 ka estudyante.

Sang 1986, nagtanyag ang eskuwelahan nga nangin St. Joseph Grade School sang elementary education kag sang 2002 nagbukas ang high school department.

Nagpasalamat si Mrs. Garcia sa tanan nga nangin kabahin sang St. Joseph School.