Volleyball star Alyssa Valdez keynote speaker sa FCDSA sa San Joaquin, Iloilo
ILOILO – Nangin keynote speaker si volleyball star Alyssa Valdez sa opening sang First Congressional District Sports Association (FCDSA) Meet 2024 sa San Joaquin, Iloilo kahapon, Pebrero 15.
Nagtingub ang mga atleta halin sa Oton, Tigbauan, Guimbal, Tubungan, Igbaras, Miag-ao kag San Joaquin.
Sa iya speech, naghatag sang tatlo ka tips si Valdez agud mangin maayo nga atleta. Lakip diri ang mangin tampad ukon “honest” kun maghampang; “stay hungry” ukon gutom nga makatuon paagi sa nahuyugan nga sports kag agud ma-improve ang kaugalingon; kag “stay humble” ukon mapainubuson bisan ano man ang malab-ot sa kabuhi.
Si Valdez nga ginabansagan “The Phenom” ang una na-discover sa Palarong Pambansa. Sa subong siya ang team captain sang defending champion nga Creamline Cool Smashers sa Premier Volleyball League (PVL).
