Naga-claim sang tag-iya sang duta nga nagpatindog sang pader sa alagyan sa Zone 2 Divinagracia, La Paz wala naka-secure sang fencing permit

ILOILO CITY — Wala nakakuha sang fencing permit sa Office of the Building Official (OBO) ang naga-claim nga tag-iya sang duta nga nagpapader sang alagyan sang Zone 2, Divinagracia, La Paz.

Suno kay Punong Barangay Maribeth Teves, ginmandu ni OBO Head, Engr. Mavin Gustilo ang pagpabakbak sang pader samtang wala pa sang napaguwa nga court order.

Domingo sang hapon, nagkadto ang taga-Anti-Squatting and Illegal Structure Unit (ASISU) agud gilayon nga bakbakon ang pader pagkatapos siya ginpahibalo sang barangay kagawad nga may residente sa sulod nga naglain ang pamatyag kag kinahanglan dal-on sa ospital.

Wala naman nagpamatok ang naga-claim nga tag-iya sang duta nga bakbakon ang pader kag nahisugtan sang tanan nga bakbakon man ang pader nga ginpa-ubra sang isa sa mga residente sa sulod agud may maagyan pa gid sila sa likod kag mangin patas sa tanan tubtob makapapanaog sang court order, suno kay Teves.

Sabado sang nagligad nga semana, masobra 25 ka pamilya ukon ginabanta 200 ka indibidwal na-apektuhan sang ginsiraduhan ang dalan.