Madasig nga pagsaka sang kaso sang HIV, STIs sa Iloilo ginakahangaw-an sang FPOP
Ginakahangaw-an sang Family Planning Organization of the Philippines (FPOP)-Iloilo Chapter ang madasig nga pagsaka sang kaso sang Human Immunodeficiency Virus (HIV) sa siyudad kag probinsiya sang Iloilo.
Magluwas sa HIV, nagadamo man ang kaso sang Sexually Transmitted Infections (STIs) kapareho sang syphilis kag ghonorea.
Suno kay Mr. Vincent Misterio, Young Key Population Program Officer sang FPOP Iloilo Chapter, base sa cummulative data sang mga nagpositibo nga kaso sa HIV, yara na sa 1,707 ang kabug-usan nga numero humalin 1986 tubtob Setyembre 2023.
Seventy percent ukon 1,645 sang amo nga numero ang halin sa category nga “male having sex with male,” samtang, 62 naman ka kaso ang na-record sa “male having sex with female” category.
PINAKABATA NGA MAY HIV
Na-record sang FPOP Iloilo Chapter nga may yara sang 12-anyos nga menor ang nagpositibo sa HIV.
Ginpaathag ni Mr. Misterio, nga tungod sa privacy indi pwede matumod kun taga-diin sa siyudad ukon probinsiya sang Iloilo ang menor.
Wala man ginsugid ni Misterio kun sa paano nalatnan sang balatian ang 12-anyos nga menor.
Sa datos sang FPOP Iloilo Chapter, 60 ka kaso ang nagpositibo sa HIV sa Iloilo sa age bracket nga 15-24 anyos. Sa amo nga age bracket wala nalakip ang 12-anyos.
