60-anyos nga lalaki pilason sang gintiro sang iya abyan sa Rizal Estanzuela, City Proper

ILOILO CITY — Pilason ang lalaki sa nagluntad nga shooting incident sa Rizal Estanzuela, City Proper subong nga aga.

Antes ang insidente, may nabatian nga sunod-sunod nga lupok ang mga residente kag nakita na lang nga duguon ang biktima nga si Jessie Gasis, 60-anyos.

Pilas ang biktima sa idalum nga parte sang tuo nga sag-ang kag naglapos sa tuo man nga porsyon sang ilong.

Gindala sa Iloilo Doctor’s Hospital ang biktima kag estable na ang kondisyon.

Suno sa residente nga si alyas Rose, mag-abyan ang biktima kag ang suspek rason nga wala sila sang ideya kun ano ang ginhalinan sang ila away.

Ginpahayag naman sang wala nagpakilala nga residente nga nakita niya nga nagsugat-anay sa footwalk ang biktima kag ang suspek kag may nagluntad pa nga pagba-isay tubtob nga naggabot sang pusil ang suspek kag gintiro ang biktima.

Sa impormasyon halin sa Iloilo City Police Office, nagpalagyo ang suspek sakay sa itom nga Toyota Vios nga may plate number FAE 770.