Maestra sa San Miguel, Iloilo ginreklamo nga nagpanggan-it sang estudyante rason nga napal-it ang parte sang ulo
ILOILO — Napal-it ang parte sang ulo sang grade 3 pupil sang Sta. Cruz Elementary School sa San Miguel, Iloilo nga gin-alegar gingan-it sang iya adviser sang Pebrero 21.
Suno kay alyas Lyn nga iloy sang estudyante, una nga nagpanugid sa iya ang classmate sang iya bata nga ila man lang kasilingan parte sa natabo. Didto niya gin-usisa ang iya bata kag nakit-an niya nga nagapula pa ang ulo sini nga napal-it.
Nagkadto si Lyn sa principal kaina agud istoryahon ang gintumod nga maestra.
Nag-ako suno sa iya ang adviser pero ginpahayag niya nga isa lang ka side sang parte sang ulo sang bata ang iya natandog. Dugang niya, wala niya man ini gingan-it kundi gingunting lang.
Ginpahayag sang adviser suno sa iloy nga nahimo niya ini tungod wala matapos sang bata ang iya ginapasulat.
Ginpabutyag pa sang iloy nga ginpudyot pa sang bata ang nagkalakakas niya nga buhok kag gindala pauli.
Nagpa-blotter na sa police kag nagdangop sa division office ang iloy tungod pursigido siya nga magpasaka sang kaso.
Tungod sa natabo, indi na mag-eskwela ang bata suno sa iloy.
Gintinguhaan sang Aksyon Radyo nga makuhaan sang pahayag ang gintumod nga maestra paagi kay Schools Division of Iloilo Public Information Officer Leonil Salvilla apang nagpahayag siya nga indi magpa-interview.
IPAIDALUM SA PSYCHO SOCIAL INTERVENTION
Imbestigaran sang Schools Division of Iloilo ang reklamo sang iloy sang grade 3 pupil sang Sta. Cruz Elementary School sa San Miguel, Iloilo nga gin-alegar gingan-it sang iya adviser sa parte sang ulo.
Suno kay Schools Division of Iloilo Public Information Officer Leonil Salvilla, nasugilanon na niya ang iloy kag ang estudyante kag nakuhaan sang mga impormasyon angut sa ila reklamo.
Ginpasumiter na nila sang report ang school head may kaangtanan sa sabat sang ginareklamo nga maestra.
Na-istorya man ni Salvilla ang ginatumod nga maestra apang gin-deny niya suno sa iya ang damage nga natuga sa bata.
Nagpasalig si Salvilla nga ipaidalum sa psycho social intervention ang estudyante kag ang ginareklamo nga manunudlo.
Ginpasiguro niya man nga mabulig ang DepEd sa bata agud makatapos sa iya pag-eskwela sang matawhay.
Magadepende naman sa school head kun ano ang adjustment nga himuon sa klase sang bata agud indi maapektuhan ang iya pagtuon, dugang pa ni Salvilla.
