Ginapatihan tul-an sang mga napatay sa nasunog nga boarding house sa San Nicolas, La Paz liwat na-recover

ILOILO CITY—Liwat may na-recover nga mga tul-an sa boarding house nga nasunog sa San Nicolas, La Paz kahapon, Pebrero 24.

Suno sa Bureau of Fire Protection Iloilo City, na-recover ang mga tul-an sa lugar kun diin una nasapwan ang bangkay nanday Lynrose Sobretodo kag Renz Aguilar.

Ginpahayag sang taga-BFP Iloilo City nga ang sniffing dog ang nakasapo sa mga tul-an samtang nagahimo sila sang clearing operations.

Gilayon nga nag-coordinate sa SOCO ang BFP Iloilo City kag ginbutang sa kahon ang mga tul-an. Gindala na sa punererya ang mga tul-an.

Ang nasambit nga sunog sang Pebrero 18 nagbilin sang duha ka napatay.

Matandaan nga lima ka balay ang totally-damaged samtang duha ang partially-damaged sa nagluntad nga sunog.