Lalaki nga nagtiro sa iya suod nga abyan sa City Proper napasakaan na sang kaso

ILOILO CITY — Napasakaan na sang kaso nga frustrated homicide si Charlie Layson, ang suspek sa pagtiro sa iya suod nga abyan sa Barangay Rizal Estanzuela, City Proper sang Biyernes, Pebrero 23.

Ini ang ginkumpirmar ni Police Captain Roque Gimeno, hepe sang Police Station 1.

Samtang estable naman ang kondisyon sang biktima nga si Jessie Gasis.

Si Layson ang nag-surrender kahapon kay Gimeno pinaagi sa bulig sang kilala niya nga police nga na-assign sa Passi City Police Station

Ginsugat pa sang mga pulis sa Passi City si Layson kag gindala sa Iloilo City Police Station kagab-i.

Sa subong nagaguwa sa imbestigasyon nga posible kwarta ang rason sang indi pag-intindihanay sang biktima kag sang suspek.

Suno kay Gimeno, base sa panaysayon sang asawa sang biktima nga sang tiun nga ara si Gasis sa presuhan kulang ang ila kwarta kag naghatag si Layson sa ila.

Apang sang nakaguwa na sa presuhan, base sa alegasyon ni Layson, nagapangayo naman sang kwarta si Gasis.

Pero suno naman sa asawa ni Gasis, wala naga-ayo sang kwarta ang iya bana. —via Aksyon Angel Mae Ciudad