HeadlinePulis

Preso nga nakapalagyo sa Jaro Police Station ginsugo nga magpanglimpyo rason nga nakaguwa sa karsel

ILOILO CITY – Ginsugo nga magpanglimpyo sa jail facility ang preso sa Jaro Police Station rason nakakuha sang kahigayunan nga makaguwa sa karsel kag nakapalagyo.

Ini base sa imbestigasyon sang kapulisan, suno kay Iloilo City Police Office (ICPO) Director PCOL Joeresty Coronica.

Ginpabutyag ni Coronica nga indi husto ang ginhimo sang pila ka personnel sang Jaro Police Station nga suguon manglimpyo kag paguwaon sa karsel ang preso.

“Gin-allow sang aton nga jailer nga magguwa para maninlo [ang preso]. It’s not allowed nga magpaguwa ka sang detainee ilabe na kun indi mo pagbantayan,” suno kay Coronica.

Imbestigaran man suno kay Coronica kun nangin practice na sa police station ang pagpaguwa sang preso sa karsel agud suguon.

Gin-relieve na ang tatlo ka mga police kag gina-imbestigaran na.

Base sa kuha sang CCTV camera sang police station las-3:14 sang hapon sang nakapalagyo ang preso nga nag-agi sa main entrance sang estasyon.

Wala ginhingadlan sang ICPO ang tatlo ka pulis nga naka-duty sang nakapalagyo ang preso.

3 KA NAKA-DUTY NGA PULIS PA-IMBESTIGARAN

Pa-imbestigaran ni Colonel Coronica ang tatlo ka mga pulis nga naka-duty sa jaro police station sang nakapalagyo ang preso sang Mierkules sang gab-i, Pebrero 28.

Wala sang may ginhatag nga pangalan ang ICPO sa tatlo ka mga pulis, apang naga-rangko sila sang Patrolman, Staff Sergeant kag Chief Master Sergeant.   

Ginpasiguro ni coronica nga pasakaan sang kaso ang pulis nga mapamatud-an may kapaltahan sa pagpalagyo sang preso.  

Gin-relieve na ang tatlo ka mga pulis kag gin-assign sa ICPO headquarters suno kay Coronica. — via Aksyon Angel Mae Ciudad

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply