Kadamuan nga lugar sa Panay, Guimaras gin-brownout
Nagligum-dulom ang kadamuan nga lugar sa Panay kag bug-os nga Guimaras tungod sa unscheduled power interruption kagab-i, Marso 1.
Ginkumpirmar ni Mr. Reagahn Alcantara, lead specialist sang National Grid Corp. of the Philippines (NGCP) nga nag-shutdown ang tatlo ka mga planta sang Panay Energy Development Corp. las-6:59 sang gab-i.
Ini ang rason sang partial blackout nga na-experyensyahan sa Panay kag Guimaras.
Base sa advisory sang NGCP, 316 megawatts ang gina-supply nga elektrisidad sang tatlo ka nag–shutdown nga planta sang PEDC sa NGCP.
Samtang, ginapa-idalom sa maintenance shutdown ang Palm Concepcion Power Corp. (PCPC) tubtob sa Marso 30. Ang PCPC nagahatag sang 135 megawatts nga supply sa NGCP.
Nagapadayon pa ang imbestigasyon sang NGCP agud matumod kun ano gid ang rason sang pag-shutdown sang mga planta.
Ini na ang ikaduha ka beses nga naka-experyensya sang malapnagon nga power interruption ang bug-os nga Panay kag Guimaras subong nga tuig. Sang Enero 2-5 naka-experyensya man sang power interruption ang Panay kag Guimaras.
