Pila ka PWDs sa probinsya sang Iloilo nagreklamo nga wala ginabaton ang ila PWD ID tungod wala sang security label – PSWDO
ILOILO– Madamo sang reklamo ngA nabaton ang Iloilo Provincial Social Welfare and Development Office (PSWDO) halin sa mga taga-probinsiya nga may Persons With Disability (PWD) ID nga wala ginabaton sang pila ka mga establisemento sa syudad.
Ini ang ginpahayag ni PSWDO Focal Person Rara Ganzon sang nagpatuman ang Iloilo City Government sang pagbutang sang security label sa PWD IDs nga taga-Iloilo City. Base sa executive order ni Mayor Jerry Trenas, sugod sang Marso 1 indi na magbaton sang PWD ID ang mga establishments nga wala sang security label.
Gin-athag ni Ganzon nga applicable lang ang mandu sang city government sa mga taga-syudad, samtang dapat nga batunon kag hatagan snag discount ang mga PWD ID holders nga taga-probinsiya.
Tungod sini, nagpanawagan si Ganzon sa city government nga pasangkaron ang information dissemination sa mga business establishments sa syudad nga sakup lang sang mandu ang mga residente sang syudad.
Gin-aku ni Ganzon nga ginakasubo nila ini tungod madamo sang mga taga-probinsiya ang napaslawan nga maka-avail sang discount sa mga business establishments pareho sang mga restaurants gamit ang ila PWD ID.