Iloilo City Mayor Jerry Treñas ginsermunan ang taga-NGCP may kaangtanan sa makapila ka beses nga power blackout sa isla sang Panay
Ginsermunan ni Iloilo City Mayor Jerry Treñas ang opisyal sang National Grid Corporation of the Philippines (NGCP) may kaangtanan sa makapila ka beses nga blackout sa siyudad kag pila ka parte sang Panay.
Sa Panay Energy Stakeholders Meeting sa City Hall kahapon, Marso 7, wala napunggan sang alkalde ang iya pagpangakig makaligad nga wala siya nakumbinser sa ginpresentar nga report ni NGCP Assistant Vice President and Visayas Systems Operations Head Christian Ereño.
Ginkwestyun ni Treñas kun ngaa nagakatabo lang pirme sa isla sang Panay ang pag-trip sang grid kag wala man ini nagakatabo sa Cebu, Davao ukon Manila gani nagapati siya nga may kapaltahan ang NGCP.
Wala suno sa iya sang dapat basulon sa blackout kundi ang NGCP kag indi ang mga power generators.
Dugang pa sang alkalde nga pwede maka-demand sang maayo nga serbisyo ang mga Ilonggos tungod nagabayad man sila sang ensakto.
Nag-meeting ang mga opisyal halin sa energy sector, local government units kag business community kaupod si mayor treñas kahapon tungod sa nagluntad nga anum ka oras nga blackout sa porsyon sang Panay kag bilog nga Guimaras sang Marso 1.