Senior citizen nasapwan patay sa talamnan sa Tigbauan

ILOILO —Nasapwan patay ang 74-anyos nga lalaki sa iya talamnan sa Barangay Jamog, Tigbauan kaina sang udto.

Suno kay Police Captain Jorge Lenantud, hepe sang Tigbauan Municipal Police Station, may pilas sa dughan ang biktima nga ginkilala kay Rufino Twala, residente sang amo nga barangay.

Sa panaysayon sang bata ni Twala, nakapuli pa ang iya amay sang Huwebes sang gab-i halin sa baylehan tungod bisperas sang pista sa ila barangay. Dugang sang hepe, wala sang nahibaluan ang bata sang biktima nga may kaaway ang iya amay.

Padayon nga gina-imbestigaran sang Scene of the Crimes Operatives (SOCO) ang insidente. —via Maria Kayla Tingzon